COMUNICATZIONE URGENTE

De sighidu s'ammentat carchi prescritzione in vigore fintzas a su 3 de abrile 2020, cun riferimentu a su Comune de Ardaule:

ISCOLA: suspensione de sas atividades didàticas in sas iscolas de ogni òrdine e gradu dae su 5 de martzu a su 15 de martzu;

BIBLIOTECA COMUNALE: serrada a su pùblicu;

COMUNIDADE ALLÒGIU: s'intrada de parentes e amigos est limitada ebbia a sos casos indicados dae sa diretzione de s'istrutura, chi est tenta a leare sas mesuras netzessàrias pro prevènnere trasmissiones possìbiles de infetzione;

ISPORT DE BASE: sunt acunsentidas sas atividades motòrias in gènere, fata in foras, in logu abertu, o a intro de logos serrados a manera esclusiva a cunditzione chi si potzat mantènnere una distàntzia dae s'unu a s'àteru a su nessi de unu metru. In alternativa, fintzas custas atividades si podent firmare;

GENTE AFIOTADA: evitare, in logos pùblicos e privados, sas ocasiones in ue b'at gente meda e chi non si podent rispetare sas distàntzia de seguresa de a su nessi unu metru dae s'unu a s'àteru;

UFÌTZIOS COMUNALES: abertos a su pùblicu cun s'intrada limitada e regulada ma cun s' invitu de coro a prefèrrere de impreare telèfono e posta eletrònica, andende a su Munitzìpiu ebbia pro atos e rechestas urgentes e chi non faghet a trantzire. Ispetende a cando tocat a ognunu, s'intrada a sa Domo Comunale est permìtida a unu a unu de sos utentes.

(MM)